Siglir tar il cuntegn
cuntegn

Svizra Cussegl naziunal na vul nagins bumbardaders svizzers

Ils aviuns da cumbat F/A-18 na duain betg vegnir transfurmads en bumbardaders. La chombra pitschna ha ditg na a la proposta da la cumissiun.

Ils aviuns d'armada F/A-18 vegnan reparads.
Legenda: Grondas investiziuns ston vegnir fatgas per ils aviuns d'armada F/A-18. Keystone

Il pachet da mesiras da 900 milliuns francs per l’armada è tradiziunalmain in punct da dispita tranter la sanestra e la dretga en il parlament. La vart burgaisa sustegna per gronda part ils plans da l’armada. Ils sceptichers da la sanestra refusan ils plans irreals da l’armada.

Dus plans chaschunan mal il venter:

  • Ils aviuns da cumbat F/A18 duain pudair bittar bumbas. Ils plans eran fruntads sin critica uschia ch’il Cussegl federal n’ha fin uss betg pudì realisar els. La cumissiun per la politica da segirtad dal Cussegl naziunal ha reprendì la pretaisa. La midada dals 30 aviuns da cumbat F/A-18 custass 20 milliuns francs.
  • En in cas serius n’avess l’armada suenter paucs dis nagina muniziun pli. Uss decida il Cussegl naziunal sch’el vul investir en muniziun supplementara 225 milliuns francs.

La mesadad dals daners è per ils F/A-18

La mesadad da las investiziuns èn previsas per prolungar il diever dals aviuns da cumbat F/A-18. Quai saja necessari perquai che quai dettia sin il pli baud novs aviuns a partir dal 2025.

Nagina maioritad per abilitad da bumbardar

Encunter la veglia da la cumissiun ha il Cussegl naziunal alura decidì cun 85 gea e 97 na da betg augmentar il credit per bajegiar enturn ils 30 aviuns da cumbat F/A-18 per che quels pon era attatgar objects e truppas estras par terra.

Persuenter ha la chombra gronda acceptà il credit per cumprar per 225 milliuns francs muniziun supplementara per las buis d'assagl e las mitraglias. Ultra da quei duei era ils cars armads da cumbat survegnir nova muniziun.

RR actualitad 12:00