Cussegl naziunal na spargna betg tar ils purs

La chombra gronda schanegia ils purs dal rispli cotschen. El ha refusà la proposta dal Cussegl federal da spargnar tar l'agricultura dals 2018 fin il 2021 en total 514 milliuns francs. Cunter ils plans da spargnar eran la PPS, PCD, PBD e parts da la PLD. La decisiun è crudada cun 119:59 vuschs.

tractor che volva il fain

Legenda da maletgs: Ils purs pon sa legrar, els n'èn betg pertutgads da las mesiras da spargn. Keystone

Tant la cumissiun d'economia sco era la cumissiun da finanzas èn era stadas cunter las mesiras da spargn. Las scursaniziuns avessen in effect direct sin la paja dals purs. Uschia sa pigiurass anc pli fitg la situaziun finanziala ha ditg Peter Keller (PPS/NW), sco pledader da la cumissiun da finanzas.

Il president da l'Uniun purila svizra, il cusseglier naziunal Markus Ritter (PCD/SG) ha fatg endament ch'ils purs hajan survegnì novas incumbensas cun la politica agrara 2014 - 2017. Parallel saja la situaziun finanziala sa pigiurada pervi da pretschs sminuents.

Ils aderents da las mesiras da spargn, ord la retscha dals Verdliberals, PS e la gronda part da la PLD han accentuà ch'era ils purs stoppian purtar lur part vid las mesiras da spargn federalas. Er la midada da structura han els purtà sco argument. La surfatscha agricula sa reduceschia, il dumber da manaschis purils giaja enavos ed er il dumber da lavurers vegnia pli pitschen, uschia ha per exempel ditg Jaques-André Maire (PS/NE).

Suenter las decisiuns dal Cussegl naziunal stattan a disposiziun ils onns 2018 - 2012 per l'agricultura 13,792 milliardas francs. 11,256 milliardas francs da questa summa èn prevesidas per ils pajamanets directs. La fatschenta va ussa en il Cussegl dals chantuns.

RR novitads 14:00