Siglir tar il cuntegn

Svizra Cussegl naziunal decida cunter stop da medis

Il provisoric stop d’admissiun da medis na vegn betg scrit durablamain en la lescha. Il Cussegl naziunal ha renvià il project en la votaziun finala, quai fitg stretg cun 97 cunter 96 vuschs ed ina abstenziun. In stop d'admissiun permanent avess cunzunt pertutgà medis da l’exteriur.

In pazient en la pratica d'in medi.
Legenda: A partir da mez dal 2016 na pon ils chantuns betg pli limitar l’admissiun da novas medias e novs medis. SRF

Il Cussegl naziunal ha renvià en la votaziun finala da permanentamain scriver reglas per la regulaziun da la spessezza da medis en la lescha. La PPS e la PLD èn sa fatgas valair.

Medis da l'exteriur pon respirar

Tar in gea avessan il chantuns en il futur pudì far dependent l’admissiun da medis dal basegn. Qua avess il Cussegl federal fixa il mussament da quest basegn.

Pertutgà avess quai cunzunt medis da l’exteriur: mediciners ch’han lavurà almain trais onns tar in’instituziun da furmaziun supplementara n’avessan betg duvrà in mussament da basegn. Quai correspunda a la lescha vertenta.

Ina soluziun limitada

L’uschenumnà stop da medis era vegnì introducì temporarmain il 2001 per franar l’augment da custs da sanadad. Suenter pliras prolungaziuns era la limitaziun vegnida revocada il 2012. Qua tras aveva quai dà in ferm augment da medis d’ospital. Il fanadur 2013 aveva il parlament lura decis d’introducir la clausula da basegn per trais onns. Questa regulaziun scada mez dal 2016.

Sco soluziun d’attatg aveva il Cussegl federal proponì, ch’ils chantuns pudessan limitar l’admissiun da novs medis tar in surprovediment. Quest stop d’admissiun avess betg mo pertutgà medis, mabain era apotechers, chiropratichers ed auters furniturs da prestaziuns.

RR novitads 09:00