Siglir tar il cuntegn

Header

cuntegn

Svizra Cussegl naziunal: Agricultura resta vatga sontga

Sco gia en la debatta davart il program da stabiliment ha il Cussegl naziunal er mussà en la debatta dal preventiv 2017 ch'el na spargna betg tar l'agricultura ed er betg tar la furmaziun. PPS e PLD han nizzegià lur maioritad en la chombra gronda a Berna.

audio
Saira: Cussegl naziunal tira vinavant il curs da spargn
ord Actualitad dals 30.11.2016.
laschar ir. Durada: 2 minutas 52 Secundas.

Directamain suenter ch'il Cussegl naziunal ha approvà il program da stabiliment è el sa mess vid il preventiv 2017. Gia l'entschatta ha il cusseglier federal Ueli Maurer appellà a las parlamentarias ed als parlamentaris ch'els duain sa tegnair vid il sboz dal preventiv. Gist er ord il motiv ch'els hajan en il program da stabiliment dà decidì da spargnar pli pauc che quai ch'il Cussegl federal ha vulì. Il frain da debits na possia uschia betg vegnir realisà.

Reducir ils custs da persunal

En l'emprim bloc da fatschentas dal preventiv è il Cussegl naziunal sa tegnì vid l'appel da Maurer. Tar ils servetschs externs, l'informatica ed il persunal ha la chombra parlamentara decidì da spargnar en total 127 milliuns francs dapli che quai ch'il Cussegl federal ha proponì.

Gia tar las fatschentas dal segund bloc da fatschentas ha il Cussegl naziunal però decidì 165 milliuns francs dapli ch'il preventiv. Tar l'agricultura ha el decidì da dar ora 62 milliuns francs dapli per ils pajaments directs, per l'ETH, las universitads las scolas autas datti era en total 34 milliuns francs dapli che quai ch'il Cussegl federal ha proponì.

La debatta cuntinuescha damaun (1.12.16) e va lura en il Cussegl dals chantuns.

Artitgels legids il pli savens