Siglir tar il cuntegn

Header

audio
Traffic public: ulteriur sustegn
Or da Actualitad dals 01.12.2021.
laschar ir. Durada: 2 minutas 51 Secundas.
cuntegn

Cussegl naziunal 240 milliuns per il traffic public

Senza il sustegn da la Confederaziun stuess la Viafier retica reducir persunal e purschida.

Il 2020 è stà in onn nair per il traffic public da la svizra. Pervia da la pandemia e perquai che las bleras interpresas han introducì homeoffice per lur emploiadas ed emploiads han las viafiers, ils bastiments ed ils bus nudà bler pli paucs passagiers. Mo era quest onn quintan las interpresas dal traffic public cun pli paucas frequenzas ed uschia cun in deficit. Sco en autras branschas vul la politica gidar ed il Cussegl naziunal ha decis mardi sco emprima chombra in pachet d'agid da 240 milliuns francs. Daners che vegnan era dabun a las interpresas grischunas, betg il davos a la Viafier retica.

Era Viafier retica ha nudà in deficit

30% damain entradas cumpareglià cun avant la pandemia. Quai la bilantscha che Stefan Engler, il cusseglier dals chantuns grischun e president dal cussegl d'administraziun da la Viafier retica, fa per quest'onn. Il dumber da passagiers n’è anc adina betg sa revegnì. Cunzunt ils esters, ils turists che giaudan in viadi cun la cotschna tras las valladas muntagnardas, manchian. E quai n’hajan els betg pudì cumpensar cun mesiras da spargn.

Nus avain durant l’onn empruvà da tegnair disciplina tar ils custs ed avain spargnà tranter trais e tschintg milliuns francs. La fin da l’onn mancan dentant 15 milliuns francs nua che la Confederaziun ed il chantun èn dumandads per agid.
Autur: Stefan Engler president VFR

Il spazi finanzial da la retica saja pitschen, di Engler. Gia l’onn passà hajan els survegnì sustegn dal chantun e da la Confederaziun, hajan persuenter dentant era stuì schliar las reservas finanzialas ch'eran avant maun. Senza ulteriur agid finanzial giessi ussa vid la substanza da la retica, admonescha el. Vul dir: La retica stuess reducir persunal e colliaziuns da tren.

Nus avain fatg tut per mantegnair noss’offerta ed era nossas collavuraturas e collavuraturs. Jau crai che quest servetsch saja era giavischà da la populaziun. E da qua nà n’hai jau betg gronds dubis ch’il stadi sustegnia en ina tala situaziun extraordinaria structuras per betg stuair reducir quellas e paucs onns pli tard puspè stuair stgaffir quellas.
Autur: Stefan Engler president VFR

Perspectivas positivas per 2022

L'autra emna decida il Cussegl dals chantuns en chaussa. Gia ussa è cler che la chombra pitschna vegn ad approvar il sustegn finanzial per il traffic public. Mo la situaziun da corona vegn era l'auter onn ad influenzar las entradas e las frequenzas, da quai è Stefan Engler persvas. I valia perquai da vinavant esser precaut e da gestiunar bain la Viafier retica. In zic optimissem dettia dentant bain.

Nus quintain per l’onn che vegn anc adina cun pli paucas entradas dentant cun entradas che creschan sin in nivel enfin 85% da l’onn 2019.
Autur: Stefan Engler president VFR

Tut dependia dal decurs da la pandemia ed ils davos dis cun la varianta omicron hajan mussà che plans e strategias ch'ins haja evaluà precautamain possian dad in di sin l'auter esser maculatura. Stefan Engler na sclauda perquai era betg che la branscha dal traffic public pudess era l'auter onn duvrar il sustegn finanzial da la Confederaziun e dal chantun.

RTR actualitad 12:00

Artitgels legids il pli savens