Ils puncts principals:
- introducir in artitgel d'experimentar
- in sistem d'in pretsch da referenza cun in pretsch maximal per medicaments, en spezial per generica
- ina nova organisaziun da tariffas naziunala
L'artitgel d'experimentar duai lubir da realisar projects da pilot che frainan ils custs ed ina nova organisaziun da tariffas duai impedir bloccadas da tariffas sco tar Tarmed, il sistem da tariffas dals medis. Vitiers propona il Cussegl federal era, ch'ils assicurads survegnan adina ina copia dal quint.
La finamira da las propostas preschentadas èn da franar ils custs per las prestaziuns sin donn e cust da l'assicurranza da malsauns obligatorica e da limitar l'augment da las premias.
La consultaziun per l'emprim da dus pachets da mesiras dura fin ils 14 da december 2018. Il pli tard sin la fin dal 2019 vul il Cussegl federal trametter en consultaziun in segund pachet da mesiras. En lez èn ils puncts principals las spartas medicaments, in provediment commensurà e transparenza tar las datas.
Emprimas reacziuns èn positivas
En general vegn beneventà l'intenziun dal Cussegl federal. Tenor la protecziun da consuments SKS haja la regenza svizra dentant dà suenter al squitsch da l'industira da sanadad. Santésuisse, l'uniun tetgala da las cassas da malsauns, beneventa en spezial ch'il Cussegl federal cumbatta puspè ils pretschs da medicaments memia auts. Dapi onns hajan las cassas da malsauns pretendì in sistem da pretschs da referenza.
RR novitads 15:00