Siglir tar il cuntegn

Header

cuntegn

Svizra Cussegl federal vul regulaziun moderna per gieus da daners

Gieus da daners sut controlla: Il Cussegl federal ha lantschà la campagna per la lescha da gieus per daners. Quella vegn avant il pievel ils 10 da zercladur.

Curt e concis:

  • purschidas da gieus per daners online sco er en ils casinos dovran vinavant ina concessiun
  • paginas da l'exteriur vegnan bloccadas
  • chantuns pon da nov lubir pitschens turniers da poker ordaifer ils casinos
  • manipular scumessas da sport vegn chastià

La lescha duai garantir ch’i vegn sa tegnì vi da las medemas reglas a las maisas da gieu ed en l’internet, uschia la ministra da giustia Simonetta Sommaruga. La finamira saja da proteger ils giugaders da dependenza u cugliunaria; plinavant stoppian las entradas da gieus vegnir da bun a l’entira populaziun.

Tge capita cun las entradas?

Avrir la box Serrar la box

Confederaziun e chantuns quintan cun entradas dad ina milliarda francs per onn. Il 2016 èn 630 milliuns francs ids ad organisaziuns d'utilitad publica. 276 milliuns èn ids a l'AVS ed a l'AI. Ils chantuns cun bancas da gieus han survegnì 47 milliuns francs.

Paginas da l'exteriur vegnan bloccadas

La lescha lubescha da nov er offertas en l’internet, però be sche quellas han ina concessiun. Paginas d’internet da l’exteriur senza concessiun vegnan bloccadas.

I dovria reglas ch’ins possia metter tras. L’internet na saja nagin spazi da dretg liber, uschia Sommaruga. Bloccadas da gieus valan tenor il departament federal da polizia e giustia er en ulteriurs 17 stadis europeics.

audio
Mezdi: Lescha davart ils gieus per daners
ord Actualitad dals 12.03.2018.
laschar ir. Durada: 3 minutas 2 Secundas.

Praschun per manipular scumessas da sport

Consequenzas ha la nova lescha er per scumessas da sport. Uschia na duai betg pli esser pussaivel da manipular talas scumessas. Fin ussa na deva quai nagina basa legala per agir encunter manipulaziuns. Cun manipulaziuns e scumessas illegalas vegnia fatg svieutas enormas, uschia il directur da l'uffizi federal da sport Matthias Remund.

Tgi che na sa tegna betg vi da las reglas, ristga cun la nova lescha cun in chasti da fin 3 onns praschun.

Pliras partidas giuvnas avevan lantschà in referendum encunter la lescha. Ils adversaris argumenteschan che las bloccadas protegian la branscha indigena.

RR novitads 14:00

Artitgels legids il pli savens