Il Cussegl federal vul en mintga cass introducir ina tala clausla. Tenor la presidenta da la Confederaziun, Simonetta Sommaruga, fissi la megliera schliaziun d'introducir questa clausla en accord cun l'Uniun europeica (UE). Sch'i na dettia nagin accord cun Brüssel, lura vul il Cussegl federal introducir la clausula da moda unilaterala. Per quest cas ha el incumbensà il Departament federal da giustia e polizia dad elavurar in messadi.
Messadi è en lavur, detagls concrets anc betg
Il messadi per ina tala clausla unilaterala duai esser pront l'entschatta da marz 2016. Parallelamain marschian las tractativas e consultaziuns cun l'Uniun europeica per cuntanscher ina schliaziun communabla.
Detagls davart questa clausla, sco per exempel la limita en dumbers concrets, n'èn anc betg enconuschents.
Sindicats cunter via unilaterala, impressaris cuntents cun decisiun
Cun ils puncts ch'il cussegl federal ha preschentà, sajan las cunvegnas bilateralas periclitadas. Quai portia consequenzas intschertas per l'economia Svizra e per la fiera da lavur, di l'uniun tetgala dals sindicats svizzers, travail.suisse. Per travail.suisse vegn en dumonda mo ina realisaziun en enclegientscha cun l'UE.
L'uniun dals impressaris svizzers beneventa la decisiun dal Cussegl federal, da timunar l'immigraziun da burgais da l'UE cun ina clausula da protecziun. I sa tractis d'ina realisaziun correcta e politicamain giustifitgabla dal nov artitgel d'immigraziun. Quai cun mantegnair en il medem mument las cunvegnas bilateralas. La branscha da construcziun ha tradiziunalmain in'auta cumpart da lavurers esters.
RR novitads 14:00
