Siglir tar il cuntegn
Inhalt

Svizra Cussegl federal vul dapli spezialists per sanadad

Quels spezialists duain era esser qualifitgads meglier. Il Cussegl federal ha tramess en consultaziun il pachet da mesiras concretas da la lescha davart las professiuns da sanadad ch'il Parlament federal ha approvà avant dus onns.

Purtret da medis durant in'operaziun.
Legenda: Il Cussegl federal vul dapli spezialists en la sanadad ch'èn lura er qualifitgads meglier. Keystone

Finamira da la lescha è da render pli attractiv las professiuns da sanadad. Tras quai duai vegnir garantì che la Svizra dispona er en futur d'avunda spezialists da sanadad d'auta qualificaziun.

Las mesiras concretas dal Cussegl federal defineschan ussa criteris standardisads per tuttas scolas, sco era tge cumpetenzas persunalas e socialas ch'ils roms ston ademplir.

Register per mesiras disciplinaras

Ultra da quai definescha il Cussegl federal tenor tge premissas che la Svizra renconuscha ils examens professiunals da spezialists da l'exteriur. Nov duai era dar in register per las professiuns da sanadad nua che mesiras disciplinaras vegnan nudadas, quai per exempel en cas da maldiever u maltractament da pazients.

Uschia vul il Cussegl federal impedir ch'in spezialist po simplamain midar chantun e cuntinuar cun sia lavur.

RR novitads 12:00