Siglir tar il cuntegn
cuntegn

Svizra Cussegl federal vul agir cunter autas taxas da roaming

Il Cussegl federal vul cumbatter las tariffas da roaming excessivas sch'ins telefonescha a l'exteriur ed er ils telefons da reclama. El ha perquai decis midadas da la lescha da telecommunicaziun. Davart quellas po ussa decider il parlament.

bleras persunas telefoneschan cun telefonin
Legenda: Il Cussegl federal vul rinforzar la posiziun dals consuments tar las taxas da telefon. Keystone

Intginas da las novas reglas rinforzian la posiziun da las consumentas e dals consuments communitgescha il Departament federal da communicaziun. Ils ultims onns han las taxas da roaming adina puspè dà da discutar. Entant èn quellas bain sa reducidas en cumparegliaziun europeica èn quellas però anc adina pli autas. Cun la lescha revedida po il Cussegl federal uss cumbatter talas tariffas autas.

Promover la concurrenza

Vitiers vul il Cussegl federal er obligar ils providers d'internet d'infurmar davart la qualitad reala da lur servetshcs, per exempel la spertadad da l'internet. Ils providers duain er far transparent sch'els differenzieschan la transmissiun da datas tranter ils divers cuntegns.

Cun la revisiun vul la regenza svizra er promover la concurrenza. Sch'il martgà disdescha duai l'access esser neutrals a la tecnologia. Purschiders cun posiziun da monopol stuessen lura betg mo garantir l'access tradiziunal ord arom mabain er quel cun fibra da vaider.

RR novitads 10:00