Siglir tar il cuntegn

Header

cuntegn

Svizra Cussegl federal vul agir areguard roaming e pirataria d'internet

Nossa telecommunicaziun è bain fitg nizzaivla. Ma ella porta era sfidas e problems. Perquai vul il Cussegl federal agir pli rigurus cunter purschiders da cuntegns protegids. En chaussa roaming vul il Cussegl federal cumbatter las tariffas autas e la reclama da telefon nungiavischada.

Il Cussegl federal vul d'ina vart cumbatter autas tariffas dal roaming e telefons da reclama betg giavischads. Suenter ditg sa nuspir, ha el preschentà oz midadas da la lescha da telecommunicaziun. Midadas en favur dals consuments avevan differentas varts pretendì dapi onns.

En il futur vul il Cussegl federal dapli cumpetenzas per agir cunter autas tariffas da telefonar e da nizzegiar datas en l'exteriur. Ed en vista als telefons da reclama betg giavischads duai l'administraziun sclerir, schebain quai dovra en il cudesch penal ina regulaziun supplementara.

Diever privat è lubì, distribuziun betg

Da l'autra vart duai quai dar in'intervenziun pli rigurusa cunter pirateria d'internet. Bain na duai tgi che chargia giu films u musica per il diever privat er vinavant betg vegnir punì. Persuenter duai quai daventar pli simpel d'intervegnir cunter purschiders da cuntegns protegids.

Providers d'internet duain pudair en l'avegnir vegnir obligads da bloccar l'access a grondas paginas da pirats da l'exteriur. Plinavant propona il Cussegl federal, che bibliotecas duain en l'avegnir pajar in'indemnisaziun a persunas che lavuran per la cultura, sch'ellas emprestan lur cudeschs u autras ovras.

RR novitads 17:00 / 18:00

Artitgels legids il pli savens