Siglir tar il cuntegn
cuntegn

Svizra Cussegl federal sbassa taxa da radio e televisiun

A partir dal 2019 custa la taxa per radio e televisiun 365 enstagl da 451 francs l'onn. D'engraziar è quai a la midada da sistem tar l'incassament.

Ina televisiun cun in telecumond ed in quint da Billag.
Legenda: Davent dal 2019 custa la taxa da televisiun e radio 365 francs ad onn. Keystone

In tschintgavel pli pauc han ins da pajar davent dal 2019 per radio e televisiun.
Il Cussegl federal ha decidì oz, che la taxa da recepziun per radio e televisiun sa sbassa da 451 sin 365 francs. Quai vala da nov per mintga chasada – sch'apparats da radio e televisiun èn avant maun u betg. In'excepziun che vala durant tschintg onns, pon quels dumandar che n'han nagin apparat ch'è pront per il diever.

Tgi che abita en ina chasada collectiva sco per exempel en ina chasa da vegls u da students, na sto en il futur betg pli pajar ina taxa da recepziun individuala. La chasada collectiva paja però 730 francs l'onn. Tgi che retira prestaziuns supplementaras na paja nagina taxa da recepziun. Era nagina taxa pajan interpresas cun ina svieuta sut 500'000 francs.

Basa per la nova taxa da recepziun per radio e televisiun furma la lescha davart radio e televisiun adattada.

Decisiun dal Cussegl federal procura per quitads

En in'emprima reacziun pretenda l'Uniun svizra d'artisanadi e mastergn - che las fatschentas vegnian deliberadas da la taglia da medias. Avant che fixar la taxa da radio e televisiun saja da definir - tge prestaziuns che sajan insumma da furnir.

Il sindicat dals emploiads da las medias SSM percunter tema - che las decisiuns dal Cussegl federal pertutgian fermamain il persunal - ed era ils programs da la SRG/SSR.

RR novitads 14:00++