Siglir tar il cuntegn
Inhalt

Svizra Cussegl federal refusa «iniziativa da burca»

El fa però ina cuntraproposta indirecta e vul chastiar quels che sforzan insatgi da curclar la fatscha.

dunna cun in nicab
Legenda: Nagin scumond general ma reglas: Quai vul il Cussegl federal e refusa perquai l'iniziativa che vul scumandar da cuvrir la fatscha. Keystone

Nagina dunna dastgia vegnir sfurzada da cuvrir sia fatscha, uschia la cussegliera federala Simonetta Sommaruga. Cun fixar quai expressivamain en il cudesch penal fetschia el ussa cler ch'el n'acceptia betg sforzs cunter dunnas.

Reglas per il contact cun autoritads

Plinavant è il Cussegl federal da l'avis ch'i dovria reglas en connex cun la burca tar il contact cun autoritads. Uschia duain quellas dastgar pretender da mussar la fatscha en situaziuns nua che quai fetschia senn.

Uschia pudessan per exempels persunas al spurtegl lur era chastiar insatgi che na mussia betg la fatscha u er refusar da dar ora in document giavischà. Tgi ch'avess tut questas cumpetenzas, conducturs, collavuraturs da la posta u auters n'ha il Cussegl federal anc betg definì.

Naginas reglas per il spazi public

Quai che pertutga il spazi public na vul il Cussegl federal betg dar tranteren als chantuns. I saja adina stà e duai era restar vinavant la cumpetenza dals chantuns da reglar co ir enturn cun dunnas che cuvran lur fatschas, uschia Simonetta Sommaruga vinavant. Prescripziuns en connex cun la burca datti dal reminent gia en ils chantuns Tessin e da Son Gagl.

Fin mez da l'auter onn vul l'uffizi federal per giustia elavurar ina proposta per trametter en consultaziun.

RR actualitad 17:00