Il Cussegl federal vul lubir a la Postfinance da dar or ipotecas e credits. Vitiers vul il Cussegl federal ina discussiun sur d'ina privatisaziun parziala da la Postfinance. Davent dad oz è averta la consultaziun sur da questas ideas.
La decisiun da princip aveva il Cussegl federal gia prendì l'atun 2018. Raschun è la situaziun economica da l'interpresa ch'è sa pegiurada adina pli fitg pervi dals tschains fitg bass. Uschia daventia adina pli grev da finanziar il provediment da basa, scriva il Cussegl federal.
Il text da consultaziun prevesa che la Postfinance survegn access al martgà da credits ed ipotecas. Credits duai la Postfinance dentant be pudair conceder en il rom dals deposits da clients che flueschan a l'interpresa sin fundament dal provediment da basa dal traffic da pajaments.
Il Cussegl federal spetga da quella midada che Postfinance possia augmentar uschia sia productivitad. Ed il medem mument duai la ristga d'investiziun per ils clients vegnir pli pitschna.
