En sia sesida dals 30 da settember ha il Cussegl federal approvà in’ulteriura mesira per rinforzar la segirezza dal provediment d’electricitad. Ovras idraulicas che adempleschan pretensiuns ecologicas pli grondas duain pudair trair a niz dapli aua per producir electricitad. L’ordinaziun correspundenta è limitada a set mais ed entra en vigur il prim d’october 2022. Cun questa mesira possian ins augmentar la producziun d’electricitad per maximalmain 150 GWh, uschia la communicaziun da la Confederaziun.
La lescha davart la protecziun da las auas fixescha la quantitad d’aua che duai adina esser en ils lais da fermada. Cun l’ordinaziun dal Cussegl federal vegn ussa reducida la quantitad d’aua restanta da las ovras electricas ch’adempleschan oz pretensiuns pli autas ch’èn minimalmain necessarias. Da las totalmain circa 1500 ovras idraulicas en Svizra pertutgia la regulaziun 45 implants.
L'ordinaziun vala a partir da sonda, il prim d'october per set mais fin ils 30 d'avrigl 2023.
