Siglir tar il cuntegn
cuntegn

Svizra Cussegl federal na vul nagin scumond da plastic – sco la UE

L'Uniun europeica vul scumandar bastunets da vatta, pusada da plastic ed auter plastic da bittar davent. La Svizra na vul dentant betg introducir las medemas reglas. Il Cussegl federal na planiseschia betg in scumond, ha la ministra da l'ambient Doris Leuthard ditg.

Vaschella da plastic vitta d'ina salata.
Legenda: Cunzunt pusada e vaschella da plastic vul l'Uniun europeica scumandar. Keystone

Il Cussegl federal prefereschia autras mesiras: per exempel dad evitar plastic, da reducir il diever e da reutilisar plastic. Uschia respunda il Cussegl federal en scrit ina dumonda dal Cussegl naziunal. En quel fa Leuthard attent a las mesiras facultativas da l'economia, sco per exempel la cunvegna davart ils satgets da plastic.

Nagina problematica en Svizra

Tenor la Cussegliera federala Leuthard na pericliteschia plastic en Svizra betg las auas. Littering vegnia cumbattì cun differentas mesiras. Il dumber da microplastic en las auas svizras saja fitg pitschen. L'Uffizi federal d'ambient sclereschia il mument danunder che quel vegnia. In studi da l'UE mussia che quel vegnia cunzunt da pneus isads, surtratgas da colur e fibras textilas.

Scumond en l'UE

L'uniun europeica vul scumandar diesch products da plastic da bittar davent. Tranter auter bastunets da vatta, bavrolas, pusada e vaschella. Products ch'i na dat anc betg en ina varianta cun material alternativ, na duajan betg vegnids duvrads uschè savens. Fin il 2025 duain buttiglias da bittar vegnir reutilisadas per gronda part.

RR novitads 06:00