Siglir tar il cuntegn
Inhalt

Svizra Cussegl federal na vul betg surdar tut la pussanza a la SNB

Il Cussegl federal refusa l'iniziativa «per il daner cumplain». La Svizra daventia in cas d'experiment per in'emprova ristgada.

Legende: Audio Saira: Ueli Maurer davart l'iniziativa «per daner cumplain» abspielen. Laufzeit 03:10 Minuten.
03:10 min, Actualitad dals 17.04.2018.

Il Cussegl federal na vul betg che la Banca naziunala svizra (SNB) haja il monopol cumplain sur da la creaziun da daners e refusa perquai l'iniziativa «per daner cumplain». Cusseglier federal Ueli Maurer tema che la Svizra daventass in cas d'experiment per in intent betg necessari e ristgà.

Tge vul l'iniziativa?

Per il mument ha la SNB il monopol tar la distribuziun da bancnotas. Ils daners che vegnan stgaffids da la SNB èn però mo in 10avel dals daners ch'è en circulaziun. 90% dals daners vegnan stgaffids da las bancas. Quai per exempel entras dar credits.

Cun l'iniziativa vulan ins dentant metter ina fin a la creaziun da daners tras las bancas. Mo la SNB duai pli savair stgaffir daners.

Plinavant vegnia tenor Maurer il sectur da las bancas fatg pli debel. Quai pertutgia lura er ils clients, cunquai che la finanziaziun da credits vegnia pli chara. Da l'autra vart dessi ina concentraziun da pussanza tar la SNB, sche quella dettia directamain credits a l'economia. Ed era il squitsch politic sin la SNB s'augmentia: Sche la SNB dettia simplamain credits a la Confederaziun, als chantuns u a la populaziuns, vegnian expensas dal stadi cuvertas tras la banca.

Autas pretensiuns

Plinavant ha Maurer fatg attent che las bancas stoppian ademplir autas pretensiuns da liquiditad ed agen chapital. Plinavant sajan segirads 100'000 francs per client, en cas ch'ina banca giaja concurs.

Il pievel svizzer decida ils 10 da zercladur davart l'iniziativa.

RR novitads 15:00