Siglir tar il cuntegn

Header

video
Proposta da reducir tschains d'aua – Vent fitg criv en la consultaziun
Or da Telesguard dals 07.11.2017.
laschar ir. Durada: 3 minutas 7 Secundas.
cuntegn

Svizra Cussegl federal na sbassa betg ils tschains d'aua, per il mument

Il zercladur aveva il Cussegl federal annunzià da vulair sbassar ils tschains d'aua a partir dal 2020 per trais onns. La cussegliera federala Doris Leuthard ha en la «Sonntagszeitung» però relativà tals plans, suenter la gronda critica ord las muntognas.

audio
Bunura: Nagina reducziun dals tschains d'aua – ils fatgs
ord Actualitad dals 07.11.2017.
laschar ir. Durada: 1 minuta 31 Secundas.

Surtut las regiuns da muntogna avevan crititgà la proposta dal Cussegl federal. Ma era partidas ed associaziuns n'eran betg satisfatgas. Tenor la proposta avessan las ovras electricas be pli stuì pajar 80 francs per kilowatt prestaziun enstagl dals 110 francs sco fin qua. Actualmain correspunda quai a 120 milliuns francs per onn che las ovras electricas pajan en il Grischun a chantun e vischnancas per pudair duvrar l'aua. En il Vallais èn quai 160 milliuns francs.

audio
Saira: Per il mument nagina reducziun dal tschains d'aua
ord Actualitad dals 07.11.2017.
laschar ir. Durada: 1 minuta 47 Secundas.

L'emprim evaluar la consultaziun

Gia la dumengia aveva la cussegliera federala Doris Leuthard declerà vers la «Sonntagszeitung» ch'ils tschains d'aua bass hajan fatg naufragi. Questa tractanda avess ni gì ina schanza en il Cussegl naziunal ni en il Cussegl dals chantuns. Suenter ch'il sustegn per sbassar ils tschains d'aua manca, restan els pia per il mument sco ch'els èn. Quai ha l'Uffizi federal d'energia confermà envers il «Regionaljournal Graubünden» da Radio SRF. Ins veglia l'emprim spetgar sin las respostas da la consultaziun e pir suenter elavurar ina nova proposta.

audio
Bunura: Nagina reducziun dal tschains d'aua – reacziun Not Carl
ord Actualitad dals 07.11.2017.
laschar ir. Durada: 3 minutas 18 Secundas.

Reacziuns dal Grischun

Not Carl, president da la cuminanza d'interess da las vischnancas da concessiun grischunas, era l'emprim surprais da questa decisiun, silsuenter haja el gì plaschair. Plaschair perquai che var 100 vischnancas hajan s'annunzià a Berna ed explitgà tge che quai muntass per ina vischnanca muntagnarda da stuair desister sin ina part dal tschains d’aua. Ins stoppia dentant esser conscient che la chaussa na saja betg giud maisa.

Fadri Ramming, secretari general da la Conferenza da las regenzas dals chantuns alpins, vesa davent dal 2020 mo ina pussaivladad, numnadamain il status quo. Ins veglia clerezza. Sco i vesa ora actualmain po quai sin fundament dal sboz da consultaziun e la reacziun be muntar, ch'il pretsch dal tschains d’aua d'oz vegn sin il pli prolungà.

Vischnancas han uss anc in zichel temp

Cun la decisiun dal departament Leuthard han las vischnancas muntagnardas uss anc in zichel temp da ponderar tge far en futur. Co i va vinavant a lunga vista cun ils tschains d'aua, resta avert.

Ils proxims onns vegnan dentant il Cussegl naziunal ed il Cussegl dals chantuns a discurrer davart il futur dal martgà da la forza electrica. Ina part da la discussiun duai era esser il futur dal tschains d'aua.

RR novitads 17:00

Artitgels legids il pli savens