Cussegl federal na duai betg auzar rentas AVS/AI sin 2017

La cumissiun da l'AVS/AI propona al Cussegl federal da betg d'auzar las rentas d'AVS ed invaliditad sin l'auter onn. La chareschia negativa ed il svilup da pajas flaivel na giustifitgeschian betg in augment da rentas. Igl è insumma l’emprima giada che la cumissiun na propona betg rentas pli autas.

Deficits tar la prevenziun per la vegliadetgna han cunzunt dunnas che lavuran parzialmain.

Legenda da maletgs: Deficits tar la prevenziun per la vegliadetgna han cunzunt dunnas che lavuran parzialmain. Keystone

La cumissiun sa basa sia decisiun sin il svilup da l'index maschadà che sa cumpona ord l'index da paja e l'index da pretschs. Almain mintga dus onns examinescha il Cussegl federal sin fundament da quest index maschadà, sch'ina adattaziun da las rentas d'AVS e d'AI è necessaria. L'ultima giada ha la regenza svizra adattà las rentas il 2015.

Tematica resta vinavant actuala

La decisiun davart in’eventual auzament da las rentas sin il 2017 vegn il Cussegl federal a prender en il proxim temp. La renta cumpletta minimala munta a 1175 francs per mais, la cumpletta maximala a 2350 francs.

La prevenziun per la vegliadetgna vegn er a fatschentar la politica ed ils votants en il proxim temp. L’iniziativa «AVSplus» che va a l’urna ils 25 da settember pretenda in augment da 10 pertschient da las rentas d’AVS.

RR novitads 16:00