Siglir tar il cuntegn
cuntegn

Svizra Cussegl federal lubescha exports d’armaziun da guerra

Il Cussegl federal lubescha d’exportar armaziun en pajais ch’èn involvids en il conflict dal Jemen.

Dus transporters en il Jemen.
Legenda: Per l’export dad in transporter da truppas armà en il Catar na datti nagina permissiun. Keystone

Tranter auter dastga vegnir furnì a l’Arabia Saudita parts da tocs per chanuns da defensiun e muniziun. Dumondas d’export per armas pitschnas e granatas da maun refusa el però. Er per l’export dad in transporter da truppas armà en il Catar na datti nagina permissiun.

Pervi da la guerra en il Jemen aveva il cussegl federal ordinà in moratori d'exportar armaziun per questa regiun. Dapi lura spetgan passa 50 dumondas sin il pult da las autoritads da permissiun, quai per exports en l'Arabia Saudita, il Catar u ils Emirats Arabs Unids.

Incumbensas per radund 178 miliuns francs

Incumbensas da miliuns eran bloccads. Correspundent era er il squitsch sin il cussegl federal grond da sclerir la situaziun. Suenter dispitas internas da pliras emnas ha la regenza ussa decis da lubir intginas dumondas per radund 178 milliuns francs.

RR novitads 18:00