Siglir tar il cuntegn

Header

Maletg d'in auto en il traffic
Legenda: Il traffic chaschuna las pli bleras emissiuns da CO2. Keystone
cuntegn

Svizra Cussegl federal fixescha mesiras cunter CO2

Il Cussegl federal ha preschentà cun tge mesiras ch'el vul vegnir a sbassar il CO2. Tranter auter vul el ch'i dettia dapli carburants regenerabels en il traffic. che producescha las pli bleras emissiuns da CO2.

Per la realisaziun da la cunvegna davart il clima da Paris è necessari ina revisiun totala da la lescha dal CO2. En quella cunvegna ha la Svizra suttascrit mesiras per reducir las emissiuns da gas cun effect da serra per la mesadad enfin il 2030, cumpareglià cun l'onn 1990. Cun las mesiras ch'il Cussegl federal ha preschentà duain ieli da stgaudar e carburant vegnir pli char.

Dapli carburant regenerabel

En il traffic duain las emissiuns da CO2 vegnir reducidas cun l'augment dal cumpart da carburants regenerabels. Medemamain duain prescripziuns per novs vehichels vegnir rinforzadas pass per pass.

Ils producents e importaders da carburants fossils duain pajar ina pli gronda part da las emissiuns ord gas cun effect da serra - enfin 90%. Nov duai era esser pussaivel ina cumpensaziun en l'exteriur. Almain 15% da las emissiuns da CO2 dal traffic duain vegnir cumpensadas en Svizra. Cun questa mesira vegn il pretsch per benzin probabel a s'augmentar.

Plinavant duai la contribuziun da CO2 sin l'ieli per stgaudar crescher. La tariffa maximala vegn auzada da 120 francs sin 210 francs. Ed era l'agricultura duai en futur vegnir cumpigliada en la politica dal clima.

Ils verds deploreschan che la lescha na va betg pli lunsch.

RR novitads 17:00

Artitgels legids il pli savens