Svizra - Cussegl federal: Engaschi cunter armas da destrucziun da massa
La Svizra s’engaschia activa- e pragmaticamain en la politica da discharmaziun en il mund. Quai scriva il Cussegl federal en ses nov rapport en chaussa. Mintga quatter onns rapporta il Cussegl federal da la politica da discharmaziun, rapport l’agentura da novitads svizra SDA.
Ina giada per legislatura fa il Cussegl federal quest rapport al parlament. Tema è la politica da discharmaziun. Ella furmia ina pitga impurtanta en la politica da segirezza svizra e saja ina contribuziun a la segirezza internaziunala. Il Cussegl federal infurmescha uschia da finamiras, prioritads e perspectivas en sia politica da discharmaziun.
En il center dal rapport da quest onn èn in scumond e l’eliminaziun da tut las categorias dad armas da destrucziun da massa.
Tge vul quai dir concret?
Concret vul quai dir, che la Svizra sustegnia per exempel activamain las investigaziuns davart attatgas cun armas chemicas en Siria, scriva il Cussegl federal. Dentant s’engaschia ella era tar las armas convenziunalas per che las normas ed ils instruments, ch’il dretg umanitar prevesa, vegnian resguardads.
Situaziun da basa vegn pli e pli cumplexa
Tenor il Cussegl federal vegnissan las relaziuns da basa adina pli cumplexas. Quai haja a che far tranter auter er cun la sfida dad acturs na-statals per il monopol da pudair duvrar forza fisica ch’è tar il stadi, il uschenumnà «Gewaltmonopol». Qua possia la Svizra contribuir cun sia maniera pragmatica e realistica a debloccar posiziuns fixas, scriva il Cussegl federal.
