16 finamiras strategicas ch’ins vul cuntanscher cun 60 differentas mesiras. Quai è il plan ch’il Cussegl federal ha mess sin maisa per la legislatura actuala 2015 enfin 2019.
Cumenzar cun renviar
Ins di: In cumpromiss è perfetg sche tut las partidas èn malcuntentas. Quai vala era per la planisaziun da la legislatura per ils onns 2015 enfin 2019 ch'il Cussegl naziunal ha cumenzà a debattar il glindesdi. Mo evidentamain datti tar quai project differentas intensitads da malcuntentientscha.
La sanestra leva entrar en materia e directamain renviar la planisaziun da legislatura al Cussegl federal. Quai cun l'incumbensa da surlavurar quella e mussar, co el vul far frunt a las sfidas ed a las ristgas, cun las qualas la Svizra vegnia ad esser confruntada ils proxims onns.
«Attatga sin la coesiun da la Svizra»
En emprima lingia crititgeschan ils socialdemocrats las bleras propostas da la dretga per reducir las regulaziuns e las leschas per l'economia e da sbassar e stritgar taglias. Tenor Roger Nordman, il schef da fracziun dals socialdemocrats, sa zuppi davos quellas propostas in masterplan, in'attatga sin la coesiun da la Svizra.« Sche quellas propostas chattan ina maioritad lura daventa la Svizra malsauna, ella survegn il mal magher politic.»
Per renviar la fatschenta al Cussegl federal n’ha la partida socialdemocrata dentant betg chattà avunda sustegn el Cussegl naziunal. Gnanc ils verds levan sustegnair lur proposta. Il cristiandemocrat Leo Müller ha accentuà l’impurtanza da manar la discussiun:
Tant il Cussegl federal sco era il Parlament federal duain avair la pussaivladad da discutar las dumondas impurtantas da noss pajais e da nossa societad e populaziun.
Era Rosmarie Quadranti, la scheffa da fracziun da la partida burgais-democratica ha vesì dapli aspects positivs che negativs. Ella ha dentant admonì ses collegas d’uffizi da salvar l’equiliber:
Il parlament sto dentant far attenziun ch’il project na perda betg la pasentella perquai che propostas mo dad ina vart vegnan approvadas. Il Cussegl federal sto pudair guvernar in bastiment che navighescha bain, era sche la mar n’è betg propi ruassaivla.
La maioritad dal Cussegl naziunal para d’avair prendì per cor quai ed ha renvià las bleras minoritads.
Uschia na duai il Cussegl federal betg elavurar in messadi per suttametter a las taglias ils gudogns d'aczias ed n’era betg cumbatter l'omissiun fiscala en Svizra. Dus giavischs da la sanestra.
La maioritad ha dentant era vulì savair nagut da propostas da la dretga, sco per exempel da schelar en las expensas da la Confederaziun sin il nivel dal 2014 ni d'elavurar in pachet cumplessiv per deregular e sbassar las taglias per interpresas.
La debatta n’è anc betg terminada e vegn il pli probabel a cuntinuar damaun.
