Tar la lescha davart l’organisaziun da l’infrastructura da viafier na vai betg mo per la viafier, mabain era per las novas offertas da bus a lunga distanza. Auter ch’il Cussegl naziunal pretenda il Cussegl dals chantuns cleras reglas da gieu. La chombra pitschna ha agiuntà ina disposiziun che duai impedir ch’ils offeriders novs fetschian da picla-ivettas. Quai sin donn e cust dal traffic regiunal. Per la cussegliera federala e ministra da traffic Doris Leuthard è quai nagut auter che protecziun da la patria. Concurrenza fetschia era bain al traffic public, ha ella ditg.
Rapports na duain betg esser publics
Il Cussegl dals chantuns è era cunter dapli transparenza tar rapports en connex cun il traffic public. El ha decidì da betg suttametter quels a la lescha da transparenza. Cun quai suonda la chombra pitschna il Cussegl naziunal e la proposta dal Cussegl federal. Gia en la cumissiun aveva la dumonda da la transparenza chaschunà per discussiuns intensivas. Mo cun la vusch da tagl dal president aveva lezza lura decidì da valitar l’infurmaziun averta pli aut che la tema d'effects cuntraproductivs. Uschia ha il socialdemocrat Claude Janiak, il president da la cumissiun era ditg, che la transparenza saja fitg impurtanta per prevegnir ed impedir la corrupziun ed il sfarlattim da daners publics.
La Cussegliera federala Doris Leuthard ha percunter fatg attent che dapli transparenza na mainia betg automaticamain a dapli segirtad, mabain savens era al cuntrari. Sch’ins publitgeschia mintga rapport d'inspecziun, possia quai avair l'effect che las interpresas emprovian da zuppentar eventuals problems da segirtad enstagl da communitgar avertamain cun las autoritads da surveglianza. Ed ina tala atmosfera da tema possia lura manar a situaziuns anc pli criticas e malsegiras.
Pervia da pliras differenzas turna il project anc ina giada enavos en il Cussegl naziunal.
RR novitads 06:00