Siglir tar il cuntegn
cuntegn

Svizra Cussegl dals chantuns restrenscha retratga dal chapital da renta

Persunas basegnusas duain survegnir dapli per il tschains da locaziun, dentant damain per la cassa da malsauns. Plinavant na duai betg pli esser pussaivel da retrair anticipadamain l'entir chapital da renta.

Dunna che spassegia sper in lai.
Legenda: Era en la pensiun duain ils daners tanscher per ina auta qualitad da vita. Keystone

Il Cussegl dals chantuns ha fatg in emprim pass per franar la ferma creschientscha dals custs tar las contribuziuns supplementaras. Per las cassas da malsauns duai en il futur vegnir paja ina pauschala pli bassa. Possess e gudogn duain vegnir resguardads pli fitg tar la calculaziun da las contribuziuns. Era la retratga dal chapital da la cassa da pensiun duai vegnir restrenschida. Da l’autra vart duain pensiunads basegnus survegnir dapli daners per il tschains da locaziun.

Dapli daners per abitaziuns

Oz survegnan persunas che vivan persulas maximalmain 1100 francs il mais per il tschains da locaziun e famiglias 1250 francs. Perquai ch'ils tschains per las abitaziuns èn s'augmentads fermamain dapi la davosa adattaziun da las contribuziuns il 2001, han blers basegnus stuì spargnar en auters secturs, per pudair pajar lur abitaziun. La maioritad da la chombra pitschna è perquai suandada il Cussegl federal ed ha augmentà la contribuziun maximala sin 1370 francs.

Sut il stritg profiteschan cunzunt ils chantuns da la refurma. La Confederaziun sto perencunter quintar cun pli autas expensas per las contribuziuns supplementaras. Sco proxim tracta ussa il Cussegl naziunal la refurma.

RR actualitad 11:00