Siglir tar il cuntegn
cuntegn

Svizra Cussegl dals chantuns refusa iniziativa per segirtad da nutriment

Uss propona il Cussegl dals chantuns ina cuntraproposta directa a l’iniziativa per la segirtad da nutriment instradada da l’Uniun purila Svizra.

Pliras persunas al cortegi da l'Uniun purila a Berna.
Legenda: L'Uniun purila ha inoltrà las suttascripziuns per l'iniziativa ils 8 da fanadur 2014 cun in cortegi tras la ciatd da Berna. Keystone

Ina gronda part dals cussegliers dals chantuns è d’accord cun las propostas fundamentalas da l’iniziativa. Uschia saja per la gronda part da la populaziun impurtant che la segirtad alimentara saja garantida e la producziun spargnia resursas, ha ditg Karin Keller-Sutter (PLD/SG). Ma tuttina haja l’iniziativa blers dischavantatgs, uschia perdian las regiuns muntagnardas en cumparegliaziun cun ils manaschis purils en la bassa. Ed er la producziun da graun ed autras plantas gudognan cunter la producziun da latg e charn, uschia argumentescha Korad Graber (PCD/LU).

Cuntraproposta è pli precisa

Ina maioritad dal cussegl suonda a la cuntraproposta directa elavurada da la cumissiun. Lezza resguarda las pretensiuns fundamentalas da l’iniziativa ma ella è pli clera e precisa. Uschia propona la cuntraproposta da francar la segirtad alimentara en la Constituziun. La cuntraproposta na creeschia betg novas subvenziuns ha accentuà il pledader da la cumissiun Isodor Baumann (PCD/UR). El medem mument resguardia questa cuntraproposta era anc finamiras da duas iniziativas da nutriment pendentas. Fundamental tar tut las trais iniziativas actualas da nutriment è la segirtad alimentara e quai saja bun da francar questa finamira en la constituziun, ha ditg Hannes Germann (PPS/SH).

L’Uniun purila ha annunzià da retrair l’iniziativa sche la cuntraproposta constat

Gia avant la debatta aveva l’Uniun purila Svizra annunzià da retrair l’iniziativa sche la cuntraproposta directa constat. Plirs puncts decisivs da l’iniziativa sajan resguardads. Ma definitiv decider da retrair l’iniziativa vegnia l’uniun pir suenter la votaziun finala.

La cuntraproposta va uss en il Cussegl naziunal. Lez aveva approvà l’iniziativa en la sessiun da primavaira. Sch’el approvescha la cuntraproposta vegn quella avant il pievel independent sche l’Uniun purila retira l’iniziativa per la segirtad da nutriment.

RR novitads 12:00