Siglir tar il cuntegn

Header

cuntegn

Svizra Cussegl dals chantuns na vul betg reglas spezialas per moscheas

La cumissiun da dretg dal cussegl dals chantuns na vul betg scumandar a moscheas d'acceptar daners da l'exteriur. Plinavant na vul ella er betg obligar centers islamics da publitgar la derivanza ed il diever da daners ed imams na duain betg stuair far lur predis en la lingua locala.

Cun 10 encunter 0 vuschs cusseglia la cumissiun a ses cussegl da refusar ina moziun or dal Cussegl naziunal. La cumissiun chatta problematic da far ina lescha che vala be per ina tscherta cuminanza religiusa.

La lescha pretenda reglas sco quai ch'i vala en l'Austria. La cumissiun fa attent che la cuminanza religiusa islamica è renconuschida en Austria sin palc da dretg public, en Svizra betg. Reglas pertutgant la finanziaziun stettian en quai connex.

La cumissiun è da l'avis ch'ins possia franar extremists islamics sin autra moda e maniera. Ella renviescha sin la nova lescha dal servetsch d'infurmaziun. Sch'il cussegl dals chantuns suonda il cussegl da la cumissiun, è la moziun giud maisa. Il cussegl naziunal aveva approvà la moziun cun 94 cunter 89 vuschs e 5 abstenziuns.

RR novitads 15:00

Artitgels legids il pli savens