Benzin e diesel custan il mument in brav toc dapli ch’anc avant in onn. Betg il davos per la populaziun en las regiuns muntagnardas che sajan per ina gronda part dependenta da l’auto saja quai in problem. Quai di il cusseglier dals chantuns Pirmin Bischof (AdC / SO).
Ina pagina d'internet cun ils pretschs da tancar duai megliurar la situaziun. Il Cussegl dals chantuns è persuenter che tancadis duain publitgar lur pretschs. Ella votaziun ha in'allianza dalla sanestra ensemen cun l'Allianza dil Center dà glisch verda. El suonda ad ina moziun da Bischof, che di che sia proposta saja tras e tras en il senn dad in martgà liber.
Pertge ina plattafurma cun ils pretschs?
Sch’il carburant fiss dapertut circa tuttina char, na fiss ina plattafurma betg uschè impurtanta. Fatg saja dentant ch’i dettia entaifer regiuns da 15 kilometers differenzas d'enfin 20 raps – e quai il medem di e per exact il medem product. Bleras persunas na sentian dentant betg quai. Ellas n’hajan betg il temp da prender l’auto e charrar tar tut ils tancadis per cumparegliar ils pretschs.
Dapli transparenza possia sbassar ils pretschs
Pirmin Bischof è persvad che transparenza possia sbassar ils pretschs. Sin ina pagina d'internet po in e scadina cumparegliar ils pretschs dals tancadis en ses conturn e vesair tgenin ch'è il pli favuraivel. Uschia crescha il squitsch sin tancadis cun pretschs pli auts. Ils Austriacs enconuschan in tal sistem gia dapi passa diesch onns. L’effect saja stà remartgabel. Ils pretschs da benzin e diesel sajan sa reducids per bunamain 20 raps.
Tut cun pitschnas investiziuns e senza sforz statal. Simplamain cun crear transparenza sin il martgà. Quai è bain ina buna idea.
Opposiziun dals importaders da benzin e Guy Parmelin
Quai na vesan betg tuts uschia. Sceptics è per exempel Roland Bilang, il mainafatschenta d'Avenergy, l'organisaziun svizra dals importaders da carburants e combustibels. La situaziun en Svizra na possian ins betg cumparegliar cun quella en l’exteriur.
Nus avain la rait da tancadis la pli spessa da tut l’Europa. Ils clients èn fitg fidaivels a lur tancadi ed ultra da quai exista gia ina gronda transparenza tar ils pretschs.
In sistem sco quel en l’Austria possia era avair effects negativs per il martgà ed ils consuments, di Bilang. Sco consumant na tschertgian ins forsa betg exnum il tancadi il pli favuraivel, mabain in tancadi che porscha dapli servetschs. Mo quests na cumparian betg sin ina tala plattafurma.
Da l’autra vart po in tancadi inditgar in pretsch per in rap pli bass e cumpara lura sin la pagina internet. Quai maina ad ina sort pseudotransparenza.
Roland Bilang na crai perquai betg ch'in tal sistem possia propi avair in grond effect sin la bursa da las automobilistas e dals automobilists. Anzi. Gratuit na saja in tal sistem era betg. Er il Cussegl federal è cunter la plattafurma. Cussegl federal e minister d'economia Guy Parmelin fa valair la medema opiniun sco Bilang.
Il Cussegl naziunal sto anc votar
Che la branscha n’ha betg plaschair da sia proposta chapescha Pirmin Bischof. Mo ch'i saja tenor meglier che la differenza dals pretschs giaja en la bursa da consumentas e consuments, e betg tar ils concerns d'ieli.
Sch’il medem capita en Svizra sco en l’Austria, ch’il pretsch da benzin croda uschia, lura perda insatgi daners.
Sco proxim decida il Cussegl naziunal sur da la moziun.
