Siglir tar il cuntegn
cuntegn

Svizra Cunvegna da basa cun UE resta finamira

Ina cunvegna da basa cun l'Uniun europeica resta ina finamira – ma uss numna il cusseglier federal Ignazio Cassis la cunvegna ina regulaziun per l’access al martgà. En cas da dispitas duai ina dretgira da cumpromiss decider. Quai tar dumondas che la giunta maschadada na po betg schliar.

Ignazio Cassis sustegn ina dretgira da cumpromiss per dispitas cun l'Uniun europeica.
Legenda: Ignazio Cassis sustegn ina dretgira da cumpromiss per dispitas cun l'Uniun europeica. Keystone

Las ultimas duas emnas ha il Cussegl federal discutà davart da la politica cun l’Uniun europeica. En il center resta la dumonda co intermediar en cas da cuntraversas. Fin uss dueva il tribunal da la Communitad europeica esser l’ultima instanza. Uss vegnan ils delegads svizzers a s’engaschar per ina dretgira da cumpromiss. Quella duai esser responsabla, sche tuttas duas agiuntas maschadadas na chattan nagina soluziun.

Co schliar il problem che mo il tribunal da la Communitad europeica ha la lubientscha d'interpretar il dretg da l'Uniun europeica a moda lianta, lascha il Cussegl federal avert en sia communicaziun.

Mesiras flancantas na stattan betg en discussiun

Il Cussegl federal vul plinavant che la Svizra possia mantegnair tut las mesiras flancantas en connex cun la cunvegna davart la circulaziun libra da persunas. Era da surpigliar las directivas da l’UE davart il status burgais na stettia betg en discussiun. Ina cunvegna davart l'access a la fiera d'electricitad europeica vul ins terminar uschè spert sco pussaivel. Ed il cussegl federal desistia da novas cunvegnas bilateralas cun l'UE.

La Svizra adempleschia tenor Cassis era tuttas premissas per renconuscher nunlimitadamain l'equivalenza da la regulaziun da la bursa svizra entras l'UE.

Cumissiun da l’UE reagescha positiv

La cumissiun da l'UE ha reagì positiv sin la strategia da la Svizra, ch'il minister da l'exteriur Ignazio Cassis ha preschentà. La cumissiun vesia ina ferma veglia da vulair lavurar vid ils puncts averts, uschia hai num da Brüssel. Finamira saja vinavant da chattar ina cunvegna enfin la fin dal 2018. La cumissiun admonescha dentant ch'i na possia betg vegnir piclà or be las ivettas.

RR novitads 15:00