Cunter gieus da fortuna per SMS

Il Cussegl dals chantuns vul scumandar concurrenzas e gieus nua ch'ils partizipants han da pajar ina contribuziun per SMS. Tals gieus duain sulet anc esser permis per promover la vendita, dentant betg per far gudogn.

purtret d'in automat da giugar

Legenda da maletgs: (maletg simbolic) Il Cussegl dals chantuna ha cumenzà la debatta davart la nova lescha da gieus da fortuna. Keystone

Concretamain vai per gieus da fortuna en las medias da massa, nua ch'ils partizipants pajan contribuziuns e l'organisatur u terzs finanzieschan il gieu u fan gudogn. Tar tals gieus na dettia ozendi nagina transparenza, nua ch'ils gudogn gajan, ha ditg il cusseglier dals chantuns Jean-René Fournier PCD/VS. La cussegliera federala Simonetta Sommaruga ha empruvà senza success da prender en consideraziun che cun questa regla dettia in tractament inegual. «Vus fidais als commerziants en detagl che porschan gieus sumegliants, a las medias dentant betg», ha ditg la ministra da giustia.

Cun tractar la nova lescha da gieus cun daners ha la chombra pitschna prendì emprimas decisiuns. La discussiun per suttametter en l'avegnir a la taglia gudogns ord lottos u ord concurrenzas sco era davart il casino en l'internet ha il Cussegl dals chantuns anc da far. La debatta cuntinuescha.

RR novitads 14:00