Davent da l’entschatta d’october vegn supponì ch’i haja ina segunda rotscha da lufs en il Vallais da mez: Cun ina trapla fotografica hajan ins scuvert almain dus lufs giuvens. Uschia l’Uffizi da chatscha, pestga ed animals selvadis (DJFW). La constellaziun da la rotscha vegnia dentant anc examinada cun analisas da DNA. En la regiun dad Augstbord, nua che l’emprima rotscha è vegnida scuverta, han ins bain dumbrà dapli lufs. Ina nova multiplicaziun n’han ins dentant betg savì cumprovar.
Dapli lufs munta betg dapli donns
Ni en la regiun dad Augstbord ni en il Vallais central èn dentant vegnids stgarpads dapli che 15 animals da niz en trais mais. Uschia che las premissas per ina dumonda da regulaziun n’èn betg ademplidas.
Ils collavuraturs da l’Uniun per l’ecologia d’animals da rapina e per management da selvaschina (KORA) fan attent che dapli lufs na muntian betg dapli victimas. En Svizra dettia adina dapli lufs. Il dumber d’animals stgarpads saja dentant mintg’onn different.
Ils animals da niz gustan main als lufs ch’il 2016
Totalmain han ils lufs dal Vallais stgarpà 46 animals da niz en la perioda da l’emprim da schaner enfin ils 31 d’october. Quai è quasi mo la tschintgavla part da l’onn passà. Tenor il manader dal DJFW è la raschun, la midada da la structura da la rotscha e la protecziun da scossas.
En l’entira Svizra hajan ins quest onn dumbrà 174 animals ch’èn vegnids unfrenda dals lufs. Cun 88 animals hai da las pli bleras unfrendas en il Grischun.
RR novitads 16:00
