Cun ils grossists vai puspè ensi

La situaziun dal commerzi a l'engrossa svizzer è sa meglerada, quai mussan las cifras dal KOF.

Ils grossists èn plain fidanza per il futur.

Legenda da maletgs: Ils grossists èn plain fidanza per il futur. Keystone

La situaziun dal commerzi a l’engrossa svizzer è sa meglierada, quai sa mussa surtut en pli lungs temps da spetga per furnir rauba ni era che las interpresas han pli gronds quantums da rauba en lur magasins. Era taxeschan las interpresas l’atgna situaziun da concurrenza sco meglierada, quai mussan las cifras publitgadas dal post da conjunctura KOF da l’ETH Turitg. La situaziun actuala saja buna per il commerzi a l’engrossa, era possia la sminuziun da persunal vegnir franada, scriva il KOF.

Passa 30% da las interpresas dumandadas spetgan er en il proxim mez onn ina meglra situaziun. Fitg optimistics èn ils grossists da products da diever. Quels han puspè vendì dapli e spetgan en l'avegnir ina pli gronda dumonda.

Ina dumonda pli gronda spetga era la sparta da victualias u products da giudiment. Sumegliant giaja er cun grossists da products da basa agriculs. Là duess il dumber da lavurers puspè s'auzar en ils proxims trais mais, uschia la communicaziun.

Percunter è la situaziun en la branscha d'IT puspè vegnida mendra. La dumonda è s'augmentada be plaunet e la vendita da products è puspè sa sminuida. Malgrà quai èn las interpresas plain fidanza quai che pertutga la situaziun economica en l'avegnir.

RR novitads 12:00