Siglir tar il cuntegn
Inhalt

Svizra Cun golf-mobil sin via: Justin Bieber sto quintar cun chasti

Durant sia visita sin la plazza da golf a Bogn Ragaz ha Justin Bieber fatg ina pitschna excursiun cun ses auto da golf electric. Ils autos da golf n'han dentant nagina lubientscha per charrar sin via principala. Uschia smanatscha a Bieber ina denunzia da la polizia chantunala dal Son Gagl.

Justin Bieber durant in concert.
Legenda: Justin Bieber durant in concert. Reuters

Sin instagram ha Justin Bieber dapli che 80 milliuns fans. Tuttina emprova el adina puspè da viver ina vita «normala». Il star da pop è era adina puspè da vesair en lieus nua ch’ins na quinta betg.

Sco per exempel glindesdi sin la plazza da golf Heidiland a Bogn Ragaz. La bun’aura ha para motivà el da dar golf. La motivaziun da dar golf na para dentant betg ad avair tegnì ditg. Justin Bieber ha bainprest cumenzà da betg prender fitg seriuras il sport: el ha cumenzà da far stucas e da far tup. Per cuntanschar in bun handicap dovri segir dapli perseveranza. Ed in «hole in one» è uschia anc lunsch davent.

Bieber charrà cun auto da golf a cumprar en sin tancadi

Alura è Justin Bieber charrà cun l'auto da golf sin in tancadi en la vischinanza da la plazza da golf. Ma el ha stuì charrar sur la via principala cun ses vehichel quai che n'è betg lubì. Uss smanatscha ad el in chasti da la polizia da traffic dal Son Gagl e sche tut va tup alura perda el era il permiss dad ir cun auto.

Sche Justin Bieber è stà sur notg en l’hotel da tschintg stailas dasper la plazza da golf Heidiland a Bogn Ragaz n’è betg enconuschet.

RR Famus e glorius 10.30