Siglir tar il cuntegn
Inhalt

Svizra Cumprar in nov aviun da cumbat, dentant senza votaziun dal pievel

Enstagl cun in fond, vulan politichers e lobists finanziar la proxima cumpra d’in nov aviun da cumbat per la Svizra via il preventiv da l’armada. Uschia na fiss in referendum betg pussaivel.

In model d'in aviun da cumbat
Legenda: In model dal Gripen ch’ina maioritad dals Svizzers n’ha betg vulì cumprar il 2014. Keystone

Perquai cusseglia la gruppa accumpagnanta, installada dal minister da defensiun Guy Parmelin, d'auzar il preventiv da l'armada uschia che la cumpra d'in aviun da cumbat po vegnir fatga sur quel. Quai scriva la gasetta NZZ da la dumengia. Il 2014 aveva il suveran svizzer refusà la cumpra da l’aviun da cumbat Gripen, grazià ad in referendum.

Betg nunpussaivel da cumbatter la cumpra

Per ils adversaris muntass la finanziaziun via il preventiv, ch’els pudessan impedir la cumpra d’in aviun da cumbat mo cun agid d’ina iniziativa. Per ina tala dovri 100’000 suttascripziuns, dubel uschè bleras sco per il referendum cunter il Gripen. La Gruppa per ina Svizra senz'armada è tenor atgnas indicaziuns pronta per in tal cumbat cun agid d’ina iniziativa, sco l’onn 1992 cunter la cumpra da l’aviun F/A-18.

RR novitads 06:00