Il contract per la cumpra dals aviuns da cumbat F-35A è suttascrit. Il schef d'armaziun Martin Sonderegger ed il manader dal project Darko Savic han signà a Berna la cuvegna cun la regenza americana per 36 jets. Quella ha in volumen da passa 6 milliardas francs.
Il pretsch è liant ed uschia èn ins er sa cunvegnì davart cuntra-fatschentas per l'industria svizra. Uschia han ins er suttascrit ina cunvegna d'offset cun il producider dals aviuns da cumbat Lockheed Martin. Firmas svizras duain survegnir empustaziuns da radund 2,9 milliardas francs.
Betg spetgà sin la votaziun
Cunquai ha la ministra da l'armada Viola Amherd fatg quai ch'ella aveva annunzià l'emna passada, numnadamain da betg spetgar in'eventuala votaziun davart l'iniziativa «Stop F-35». Davart quella fissan las Svizras ed ils Svizzers vegnids il pli baud a savair decider la stad u l'atun da l'auter onn, quai suenter ch'il Cussegl federal ha presentà ses messadi e suenter che las duas chombras dal Parlament federal han debattà.
Initiativa na vegn betg davant il pievel
Ils iniziants e las iniziantas da l'initiativa «Stop F-35» han ussa decis da retrair l'iniziativa. Cun quai ch’ils contracts èn vegnids suttascrits avant il mars 2023 n'era ina votaziun pli pussaivla. Sco ch'ils iniziants e las iniziantas han communitgà vers SRF sajan els dischillus ch'il pievel na possia betg decider. Cuninizianta Priska Seiler Graf da las PS manegia ch'els duain retrair l'iniziativa perquai ch'els na sustegnian betg ina «pseudo-votaziun» en la quala las votantas ed ils votants na pon betg decider davart la decisiun da cumpra.
Quai è ina schleppa per la democrazia directa.
Ils aderents da l'aviun da cumbat han beneventà la decisiun da retrair l'iniziativa. Cusseglier dals chantuns Werner Salzmann (PPS) ha ditg envers SRF ch'el avess giavischà ch'ils iniziants avessan retratg l'iniziativa gia suenter il cumenzament da la guerra en l'Ucraina or da motivs da politica da segirezza.
Avant dus onns aveva ina stretga maioritad da las votantas e dals votants ditg Gea al credit da bun 6 milliardas francs per novs aviuns da cumbat. Strusch in onn pli tard annunzia la cussegliera federala Viola Amherd che l'aviun american F-35 ha persvadì il pli fitg en l'evaluaziun. Ils 36 aviuns duain remplazar fin l'onn 2030 ils F/A-18 e F-5 da l'armada svizra.
