Siglir tar il cuntegn

Header

Navigaziun

Il maletg mussa il cusseglier dals chantuns dal PCD Stefan Engler.
Legenda: Stefan Engler (PCD) vuless ina politica da linguas pli activa sin champ naziunal. Keystone
cuntegn

Svizra Cumissiun federala per dumondas linguisticas

I dat cumissiuns per tut: Per la sanadad, per la segirezza, per la planisaziun. Perquai duai da nov era dar ina cumissiun federala per dumondas linguisticas. Quai propona il cusseglier dals chantuns Stefan Engler (PCD).

Il parlamentari grischun ha inoltrà ina moziun durant la sessiun federala a Berna. Il Cussegl federal duai instradar la cumissiun aifer il proxim messadi da cultura per ils onns 2021-2024.

Jau sun fitg surprais ch'i na dat anc betg ina tala cumissiun.
Autur: Stefan EnglerCusseglier dals chantuns (PCD)

La cumissiun per dumondas linguisticas duai esser ina plattafurma, nua ch'ils commembers pon sa barattar e perfin cussegliar la Confederaziun. Exempels concrets fissan cura ch'i va per la dumonda da l'englais u franzos en scola u era per la promoziun da las linguas minoritaras en Svizra.

La Confederaziun mussa pauc engaschi per la promoziun da linguas minoritaras.
Autur: Stefan EnglerCusseglier dals chantuns (PCD)

Er il rumantsch duai profitar: Actualmain saja plitost uschia che la Confederaziun mettia bain a disposiziun daners – surlaschia dentant l'entira lavur da promoziun al chantun Grischun. Stefan Engler è da l'avis ch'era la Confederaziun stoppia dar dapli paisa a la politica da linguas.

Far part da la cumissiun per dumondas linguisticas duain mintgamai trais represchentants da las quatter linguas naziunalas (tudestg, franzos, talian e rumantsch) sco era trais represchentants d’autras linguas che vegnan discurridas en Svizra (p.ex. portugais u englais).

RR novitads 07.00