Siglir tar il cuntegn
Inhalt

Svizra Cumissiun dal Cussegl naziunal di na a «no-Billag»

La cumissiun da telecommunicaziun dal Cussegl naziunal è cunter l’iniziativa dal pievel «no-Billag», che vul abolir ils daners per radio-e televisiun, quai senza porscher ina cuntraproposta. La cumissiun dal cussegl naziunal suonda uschia al cussegl dals chantuns.

Purtret d'ina copia da la Billag cun en il quint da 451 francs.
Legenda: La cummisiun da telecommunicaziun dal cussegl naziunal refusa l'iniziativa «no-Billag» Keystone

La cumissiun da telecommunicaziun dal cussegl naziunal ha decidì da refusar l'iniziativa «no-Billag» cun 16 cunter 8 vuschs. La decisiun cunter ina cuntraproposta è crudada cun 15 cunter 10 vuschs. In'iniziativa da la cumissiun è crudada cun 14 cunter 11 vuschs. La cuntraproposta indirecta avess gì la finamira da metter a disposiziun maximalmain 1,1 milliardas da las taxas a l'SRG. Sur tut reducir las taxas per l'SRG vul la PPS.

Central per la democrazia

Tenor la pluralitad da la cumissiun vegn purschì grazia a las taxas per radio e televisiun, in bun Service public en tut las regiuns linguisticas da la Svizra. Il sistem da taxas d'oz saja central per ch'i funcziunia insumma da sa far in'atgna opiniun en il senn democratic. Er per ina coesiun naziunala sajan las taxas centralas, uschia hai num en la communicaziun da la cumissiun.

Il Cussegl federal haja plinavant vis ch'i saja necessari d'agir. El vul reducir la cumpart da SRF sin 1,2 milliardas francs. Las taxas da radio e televisiun duain vegnir sbassadas sin sut 400 francs per chasada. Pli bleras mesiras na sajan tenor la cumissiun betg necessarias. Il cussegl dals chantuns era s'exprimì unanimamain cunter l'iniziativa ed er cunter ina cuntraproposta.

Ina minoritad pretenda ina cuntraproposta che reducescha las taxas sin 200 francs ad onn. Ella è da l'avis ch'ils consuments duain decider sezs tge products medials ch'els vulan consumar cun questa summa.

L'SRG survegna oz radund 70% enfin 73% da las taxas che la Billag incassescha. Da las total 1,35 milliardas francs retschaiva ella radund 1,235 milliardas. Las chasadas privatas pajan il mument ina contribuziun annuala da 451 francs. Il sbassament sin 400 francs è collià cun ina midada da sistem da pajar per apparats tar ina per chasadas.

Sur tut la PPS sustegna l'iniziativa da «no-Billag»

La partida populara svizra è trumpada da la decisiun da la cumissiun. Ella propona da reducir ils pajaments da la Billag ed ha inoltrà ina cuntraproposta che pretenda da smesar las taxas.

La partida cristiandemocrata PCD refusa l’iniziativa e propona da dir na a l’iniziativa «no-billag».

RR novitads 17:00