Siglir tar il cuntegn

Header

video
Caroni: «Procedura da relaschada vegn averta»
Or da News-Clip dals 20.05.2020.
laschar ir
cuntegn

Cumissiun da la dretgira Procedura da relaschada d'uffizi cunter Michael Lauber

Il squitsch sin il procuratur public general Michael Lauber crescha: La cumissiun da dretgira dal Cussegl naziunal e dal Cussegl dals chantuns ha lantschà ina procedura da relaschada.

L'emna passada ha la cumissiun da dretgira stgaffì ils principis d'agir per il cas, ch'ella veglia lantschar ina procedura da relaschada cunter Lauber. Quai sch'il suspect ch'il procuratur public haja violà sias obligaziuns d'uffizi sa verifitgescha. Quai è uss tenor la cumissiun il cas.

La decisiun da la cumissiun è uss sin maisa; cun 14 cunter 3 vuschs ha ella decis da lantschar ina procedura da relaschada, ha communitgà il president da la cumissiun Andrea Caroni (PLD) la mesemna saira davant las medias. Schizunt la PLD, ch'ha fin uss anc sustegnì il pli fitg Lauber, pretenda uss sia demissiun.

Uss sto la cumissiun examinar il fatg. Silsuenter pudess ella proponer a l'Assamblea federala da relaschar Lauber da l'uffizi. Quella vegniss sin il pli baud a decider durant la sessiun davart la causa.

Il segund «showdown»

L'atun 2019 aveva il parlament confermà Lauber en uffizi. Sia reelecziun era gia stada dispitaivla. Motiv eran inscunters betg protocollads cun il schef da la FIFA Gianni Infantino. Quai durant il temp che la Procura publica federala aveva differentas proceduras cunter la fifa.

La cumissiun da dretgira era da lez temp s'exprimida cunter ina reelecziun da Lauber. Per la maioritad da la cumissiun era gia da lez temp cler che Lauber ha violà sias obligaziuns d'uffizi.

Situaziun è in'autra

La situaziun è uss dentant in'autra. Ina procedura disciplinara da l'autoritad da surveglianza da la procura publica (AB-BA) è vegnida tar la conclusiun che Lauber haja cuntrafatg a differentas obligaziuns.

Il procuratur haja pliras giadas ditg manzegnas, agì illoial, rut l'uschenumnà «conduct of act» da la procura publica ed impedì la procedura da la AB-BA. Plinavant na mussia il procuratur public nagina chapientscha. Plinavant haja Lauber ina faussa enclegientscha da sia professiun. En la summa sajan quai memia bleras violaziuns dals duairs.

RTR novitads 20:00

Artitgels legids il pli savens

Ir a sanester Ir a dretg