Siglir tar il cuntegn

Header

cuntegn

Cumissiun d'ambient Suenter l'offensiva solara er dapli energia da vent


Il Parlament federal è sa cunvegnì questa sessiun entaifer da curt temp ad ina offensiva solara. Uss vul la Cumissiun per ambient, planisaziun dal territori ed energia dal Cussegl naziunal (UVEK-N) realisar il medem cun l’energia da vent. Concret duan las pussaivladads da far recurs cunter parcs da vent vegnir restrenschidas marcantamain.

Construir immediat novs parcs da vent

Sin il Grenchenberg en il Giura da Soloturn è planisà in parc da vent cun quatter turbinas da vent e sin las collinas en il nord da Losanna in cun otg turbinas. Il Tribunal federal ha gia approvà la planisaziun d'utilisaziun, la permissiun da construcziun manca anc. Protecturs e protecturas da la cuntrada han protestà.

Tenor la proposta da la cumissiun dal Cussegl naziunal na duess ina permissiun da construcziun betg pli esser necessaria. Ils parcs da vent pudessan vegnir bajegiads immediatamain.

La cussegliera naziunala da l'Allianza dal center Priska Wismer è da l'avis che quests parcs da vent possian furnir l'energia da vent duvrada per il proxim enviern. Ch'i na dat betg la pussaivladad per recurs cunquai che la permissiun da construcziun scroda, saja giustificabel. Uniuns per la protecziun da l'ambient possian s'exprimer durant la planisaziun d'utilisaziun. Oz saja pussaivel dad ir pliras giadas davant il Tribunal federal cunter in project, en avegnir, uschia Wismar, veglian els che quai saja be pussaivel ina giada.

Critica da la PPS

La cumissiun d'ambient ha votà l'emna passada cun 19 cunter 1 vusch per quest'offensiva d'energia da vent. Tuttas partidas sustegnan quella, be la PPS è cunter. «Il parlament planisescha in ulteriur exercizi da hauruck. Persunalmain sun jau fitg sceptic», di il schef da fracziun Thomas Aeschi. «La Svizra n'è betg in pajais da vent. I dat grondas consequenzas per l'ambient, perquai duai propi dar ina evaluaziun dals interess.»

Er aifer la PPS datti però simpatisants e simpatisantas per l'offensiva da vent. Surtut perquai che la proposta da la cumissiun simplifitgass er la procedura da permissiun per il lai da serra da Trift en la Part Sura Bernaisa.

Sco proxim ston omaduas chombras dal parlament dar lur consentiment per la proposta da la cumissiun. Silsuenter duai l’offensiva d’energia da vent entrar en vigur sco lescha urgenta. Sco finamira numnan ils politichers da l’ambient la fin da l’onn.

audio
Per tadlar: las novitads da las 08:00
ord RTR Audio dals 28.09.2022.
laschar ir. Durada: 7 minutas 6 Secundas.

RTR novitads 08:00

Artitgels legids il pli savens