La pli impurtanta tractanda dal cumin da quest onn è stada l’iniziativa. Las votantas ed ils votants, il «Landvolk», han laschà ir da l’aua giu la pretensiun senza discussiun. Il punct picant vi da la proposta era che l’iniziant sez aveva vulì retrair sia pretensiun – el è dentant stà memia tard la fin da mars. Il carnet da votar era gia vegnì tramess.
Plan d'instrucziun 21 «moderat ed autonom»
Uschia è il chantun da l’Appenzell Dadens l’emprim che ha decis davart in’iniziativa dal Plan d’instrucziun 21. En auters chantuns èn talas dumondas anc pendentas.
Il Plan d’instrucziun 21 vegnia realisà en il chantun a moda moderada ed autonoma, ha ditg il mastral Inauen. Ins vegnia a sa deditgar a la cultura e tradiziun locala sco er a las valurs cristianas. Il Plan d’instrucziun 21 è vegnì elavurà dals chantuns da la Svizra tudestga. La finamira è in’armonisaziun da la scola populara.
Confermà commembers da la regenza
En pli èn ils commembers da la regenza sco er Roland Inauen sco mastral regent vegnids confermads. Tenor tradiziun barattan il regent ed il quiet mastral (president dal cussegl guvernativ e vice) mintga dus onns lur rolla.
Il cumin ha plinavant er tractà quatter projects da lescha, las qualas èn tuttas vegnidas approvadas, numnadamain:
- revisiun da la lescha da protecziun da datas
- lescha davart il traffic publica
- adattaziuns da la lescha da taglia chantunala
- definiziun dal plan da zonas dad auas
RR novitads 17:00