Il Cussegl federal ha preschentà la missiva al parlament en connex cun las midadas tar la lescha d’egualitad. En ils puncts centrals resta la regenza tar sia opiniun.
Uschia duajan tut las interpresas cun dapli che 50 emploiadas ed emploiads vegnir obligadas da far regularmain analisas da paja. Questa obligaziun duai valair tant per l’economia privata sco era per las instituziuns publicas. Pertutgadas fissan sulet 2% da las interpresas, ma tuttina 54% da tut ils emploiads en Svizra.
Obligaziun d’infurmar il persunal
Suenter ina tala examinaziun sto l’interpresa far public ils resultats da l’analisa. Uschia duajan las interpresas era gist curreger las inegualitads, scriva il Cussegl federal. Ina polizia da paja che controllass en num dal stadi na duai quai dentant betg dar. Il Cussegl federal quinta che cun stuair far public inegualitads da paja vegnian quellas era gist schliadas. Era renunzia il Cussegl federal da publitgar ina glista naira.
Travaille.Suisse vul controllas e sancziuns
L'Uniun tetgala dals lavurants, Travaille.Suisse, n'è betg dal tut cuntenta cun la decisiun dal Cussegl federal. I saja in pass en la dretga direcziun, ma che las analisas na vegnan betg controlladas dal stadi è in manco. Plinavant na crain els betg ch’ì vegnia a purtar meglieraments senza che quai dettia sancziuns cunter interpresas che na pajan betg pajas egualas ad um e dunna.
RR actualitad 17:00