Siglir tar il cuntegn

Header

Navigaziun

Test d'allergias sin la pel.
Legenda: Tar in test d'allergias vegn exposta la persuna pertutgada ad allergens pussibels. Keystone
cuntegn

Cumbatter allergias – quant enavant è la scienzia?

Ils sintoms da las allergias sa la medischina cumbatter senza gronds problems. Cun adrenalin sa ella perfin curar in ferm schoc allergic. Tractar dentant las ragischs da las allergias n'è betg uschè simpel.

I dà allergias, ch'èn curablas, ed autras, nua che quai na va betg. Tge ch'i dat dentant adina èn medicaments cunter ils sintoms da las allergias.

Allergias curablas e betg curablas

Ina maniera per curar allergias è ina sort da vaccinaziun. Quai è pussaivel tar allergias da piztgadas d'avieuls u da vespras u er tar in'allergia da pollens. Tar questa metoda ha il corp da vegnir disà vi dals allergens. Quai vegn fatg cun squittas e tut tenor er cun tablettas.

Quant savens ch'ins ha da repeter la terapia è fitg different. Quai dependa adina quant ferm che l'allergia è ed er sin tge ch'ins è precis allergic.

Tar allergias da mangiativas na datti enfin oz nagins medicaments per tractar l'allergia sezza.

Evitar ils allergens è l'unic che funcziuna propi

La scienza è bain londervi. I dat er gia autras terapias er per autras allergias. Quellas na vegnan però anc betg vendidas.

L'unica metoda – e quella vegn cussegliada er fin oz adina er da medis – è quella dad evitar quai che causescha l'allergia, ils allergens.

Vul dir, tgi ch'è allergic sin nuschs lascha davent las nuschs e tgi ch'è allergic sin pail da giat na lascha betg il giat en letg. Quai è la meglra metoda per evitar in schoc allergic.

RR actualitad 06:00+