Il cumbat da pussanza tranter il primminister Ahmet Davutoglu ed il president Recep Tayyip Erdogan è para terminà: La partida regenta AKP vul clamar ad in di da partida ils 22 da matg. Quai ha confermà Davutoglu envers medias.
A quest inscunter na veglia el «sut las circumstanzas dadas» betg pli star a disposiziun per l’elecziun sco president da la AKP. Tenor ils statuts da la partida stuess el lura er sa retrair da ses post sco primminister. Ses engaschi per la partida vegnia el a cuntinuar sco represchentant dal parlament tirc, ha ditg Davutoglu.
La decisiun per far in di da partida saja vegnì prendida ad in inscunter extraordinari da la AKP, han rapportà CNN-Türk ed NTV.
Midada da constituziun procura per charplina
Pir l’emna passada aveva la direcziun da l’AKP restrenschì las cumpetenzas da Davutoglu. Columnists e politichers da l’opposiziun avevan valità quest pass sco culp cunter il schef da regenza e president da la partida. Davutoglu aveva surpiglià omadus posts d’Erdogan, suenter che quel era vegnì elegì dal pievel sco president da stadi l’avust 2014.
Adherents d’Erdogan suspectan che Davutoglu veglia sutminar la pussanza dal president. Tenor rapports medias han ils dus politichers ina charplina pervi d’ina midada da constituziun che vul introducir in sistem presidial. La midada procurass per dapli pussanza per Erdogan sco schef dal stadi.
Per pudair far in referendum constituziunal davart il sistem presidial duvrass l’AKP ina maioritad da 60 pertschient en il parlament. Actualmain mancan a la partida 13 sezs per realisar quai.
RR novitads 14:00