Il chantun Basilea-Citad serra giu la vita publica en vista al dumber d'infecziuns permanentamain aut. Cuntrari al trend svizzer na sa reducescha la cifra da novas infecziuns actualmain anc betg en il chantun Basilea-Citad. A partir da glindesdi vegnan serradas ustarias, bars e cafès, vitiers vala per occurrenzas in dumber maximal da 15 persunas. Er serrads vegnan ils centers da fitness, bogns cuverts e casinos, ha ditg il minister da sanadad, Lukas Engelberger, avant las medias. Las mesiras valian fin ils 13 da december.
Vallais prolunghescha mesiras
Er en il Vallais restan las ustarias serradas e tant en il rom privat sco en il spazi pulic na dastga betg dapli che 10 persunas s'inscuntrar. Il chantun prolunghescha la gronda part da las mesiras cunter il coronavirus – medemamain enfin ils 13 da december. Tschertas relas ha la regenza tuttina schluccà. P. ex. dastgan puspè fin 50 persunas sa participar ad acts religius ed uffants e giuvenilis dastgan puspè far sport en il rom da las prescripziuns federalas.
