CSS a Schaffusa tschertga novas localitads suenter attatga

Ils biros da l’assicuranza CSS a Schaffusa nua ch’in um aveva attatgà ils 24 da fanadur ils emploiads cun ina resgia da motor, na vegnan betg pli duvrads da l’assicuranza. Ella tschertgia novas localitads a Schaffusa, ha ditg ina pledadra ed uschia confermà in rapport dal radio local, Radio Top.

Purtret dal segn da la CSS davant la chasa a Schaffusa.

Legenda da maletgs: Ils biros da la CSS a Schaffusa restan serrads. L'assicuranza tschertga novas localitads. Keystone

Ord motivs da pietad na veglia l'assicuranza CSS betg pli retrair ils biros nua che l'attatga cun ina resgia a motor ha gì lieu, uschia la pledadra. Quant ditg che la tschertga possia cuzzar n'ha la pledadra betg pudì dir. Ils clients pertutgads vegnian il mument tgirads a Winterthur. Quels che giavischian ina cussegliaziun a Schaffusa survegnian ina visita dals collavuraturs a chasa.

L’um ch’ha attatgà la filiala sa chatta il mument anc en arrest d’inquisiziun. Ina da las persunas attatgadas aveva survegnì blessuras fitg grevas ed aveva stuì vegnir operada. Quatter ulteriuras persunas èn u stadas blessadas levamain u ch'ellas han gì in schoc.

RR novitads 12:00