Il sindicat autonom dals postins renfatscha a la direcziun da la Posta da betg pli s’interessar per sia rait da filialas. Gia uss na rivassan passa 800’000 persunas betg pli aifer temp util tar ina filiala da la posta, scriva il sindicat.
Ils postins teman che la reducziun la pli gronda vegn ad esser en ils chantuns da muntogna e da pajais. L’onn 2001 deva quai anc 3’500 filialas da la posta en tut il pajais.
La Posta vul stritgar fin l'onn 2020 radund 600 filialas
Questa bun'ura era vegnì enconuschent, che la posta cuntinua cun la reducziun da sias filialas. La digitalisaziun fetschia vinavant fastidis a la posta scriva l'interpresa. Las svieutas als spurtegls sa sminuessian cuntinuadamain. En cifras: 63% damain brevs e 37% damain pajaments dapi l’onn 2000. E quai trend cuntinueschia.
Ord quests motivs aveva la posta annunzià da reducir il dumber da filialas sin radund 800 fin 900 tocs fin l’onn 2020. A medem mument vul l’interpresa procurar per alternativas per ses clients, cunzunt en furma d’agenturas sco quai ch’i dat gia en bleras stizuns, era en il Grischun.
Planisà naginas relaschadas
Tenor la Posta na saja betg planisà da relaschar glieud. Il sindicat dals postins percunter scriva, che la posta na possia betg excluder relaschadas. En tut lavuran radund 50’000 persunas tar la posta, scriva l’agentura da novitads svizra sda.
RR novitads 10:00