Svizra - Critica ad autoritad d'admissiun pervi da pirla «Yasmin»
La cassa da malsauns CSS fa reproschas a l'autoritad d’admissiun Swissmedic. Ella n’haja betg controllà bain avunda las infurmaziuns per pazientas e per medis da la pirla anticonceptiva «Yasmin».
Il motiv per las reproschas da la CSS è il cas da la giuvna dunna Céline. Il 2008 ha la giuvna gì ina trombosa suenter ch’ella ha prendi la pirla Yasmin. Dapi lura è la dunna grevamain impedida.
La cassa da malsauns da Céline, la CSS, pretenda uss da Swissmedic da lavurar pli conscienziusamain e che l’instanza vegnia controllada meglier tras il Cussegl federal.
