Siglir tar il cuntegn
Inhalt

Svizra Criteris per la cuntanschibladad duain vegnir fixads regiunal

Il cussegl dals chantuns ha crititgà che la rait dad uffizis postals sa sminuescha. El ha approvà pliras moziuns dal cussegl naziunal che pretendan ina midada en la lescha da la posta.

Logo da La Posta
Legenda: la rait d'uffizis ostals sa sminuescha. Quai na plai betg al parlament. Keystone

In giavisch central è la cuntanschibladad da servetschs da posta e pajament. La cussegliera federala Doris Leuthard (PCD) ha dentant fatg attent, ch'il parlament sez haja definì ils criteris per la cuntanschibladad. La Posta haja adina resguardà ils criteris. Ella regorda era al fatg che adattaziuns en la lescha da La Posta vegnian gia realisadas. La gruppa che tschertga soluziuns preschentia ils resultats la primavaira.

Stai objectivs!
Autur: Doris LeuthardCussegliera federala PCD

Ils Cussegls na vulan betg spetgar

Quai è dentant memia tard per il Cussegl dals chantuns: La maioritad ha acceptà la moziun da la chombra gronda en furma levamain midada. Questa pretenda dal Cussegl federal ch'ils criteris per mantegnair uffizis postals duain vegnir controlladas e fixadas regiunalmain – e betg sco ussa sin plaun naziunal. Servetschs da posta duain esser accessibels per tuts en 20 minutas a pe ni cun il traffic public – e betg sco uss mo per 90% da la populaziun. Ed era ils servetschs da pajament duain esser cuntanschibels en 20 minutas e betg sco actualmain en 30 minutas.

La chombra pitschna ha era acceptà la moziun che prevesa dapli transparenza areguard la realisaziun da la cuntanschibladad.

Extensiun da las agenturas

Meglierar la situaziun vul ins era entras quai che agenturas da posta stoppian en futur porscher tut ils servetschs da provediment da basa da La Posta, senza il servetsch da pajar en contant. Tenor il cusseglier naziunal Martin Candinas (PCD) possia uschia vegnir segirà in bun service public.

Medemas cundiziuns per la concurrenza

La moziun che pretenda las medemas cundiziuns per ils concurrents da La Posta è dentant vegnida refusada cun 23 tar 18 vuschs. Quella cumpiglia per exempel l'access a las chaschas postalas da la posta ni scumonds da rabats d'accuplaments.

RR novitads 17:00