Il punct culminant da la crisa da corona n’è anc betg cuntanschì. Perquai na saja anc betg cler, cura ch’ins possia puspè schluccar las mesiras, quai ha ditg il cusseglier federal Alain Berset. El è precaut en sia analisa, la situaziun saja il mument difficila. I dovria vinavant blera perseveranza, flexibilitad
ma era ruaus, uschia Berset.
Las cifras da l'Uffizi federal da sanadad publica
Mintga di dettia var 1’000 novas infecziuns en Svizra. Mintga di morian var 50 persunas pervi dal virus. Tenor las cifras da l'Uffizi federal da sanadad publica BAG datti en il fratemp var 20'300 cas registrads en Svizra. 540 persunas èn mortas en consequenza dal coronavirus. Quai èn 56 persunas dapli ch'il BAG ha annunzià ier venderdi.
Fin ussa hajan ins fatg dapli che 150'000 tests, las cifras sa basan sin ina communicaziun ch'il BAG ha annunzià la sonda damaun.