La banca gronda Credit Suisse ha violà il dretg da controlla a moda gravanta. Quai en connex l’affera davart la surveglianza da managers da la banca. A questa conclusiun vegn la Surveglianza federala dals martgads da finanzas FINMA.
Tranter auter aveva la Credit Suisse laschà observar ses anteriur top manager Iqbal Kahn da detectivs – quai avant sia midada tar la concurrenta, l'UBS. En tut haja la Credit Suisse ordinà 7 observaziuns da collavuraturs e collavuraturas tranter ils onns 2016 e 2019 e quai per gronda part senza in’argumentaziun plausibla. La FINMA ha en consequenza prendi pliras mesiras: Tranter auter stoppian en l’avegnir observaziuns eventualas vegnir approvadas da la direcziun da la banca – dal CEO e dal presidi dal cussegl d'administraizun – per che la responsabladad da talas acziuns saja reglada cleramain.
Pervi dal scandal, che n'ha betg mo procurà per lingias grassas en Svizra, avevia dà pliras midadas persunalas tar la Credit Suisse. Uschia ha er il CEO da gliez temp, Tidjane Thiam, stuì bandunar la banca.
